- 🖊 本周重點
- 🗞 News 1: 新型監控病毒透過 UEFI 套件入侵 Windows 系統
- 🔖 News 2: 研究員建議以機器學習作為藍牙的認證方式
- 📱 News 3: 美國司法部靠面部識別技術結束 15 年追捕
- 問題回顧
- 更多內容
🖊 本周重點
- 新型監控病毒透過 UEFI 套件入侵 Windows 系統
- 研究員建議以機器學習作為藍牙的認證方式
- 美國司法部靠面部識別技術結束 15 年追捕
🗞 News 1: 新型監控病毒透過 UEFI 套件入侵 Windows 系統
FinFisher，一個係 2011 年就被用嚟監控（Surveillance）電腦嘅惡意軟件（Malware），最近被發現值入係 Windows Boot Manager，感染咗電腦嘅 UEFI。
FinFisher 有能力去偷取被感染用戶嘅檔案、記錄所有按鍵、獲取電郵內容同獲取麥克風同攝像鏡頭嘅控制權。
由於 FinFisher 有能力感染 UEFI，呢隻 Malware 亦都有能力去改變電腦加載操作系統（Operating System）嘅方式，令一般嘅保安檢查工具無辨法檢查出嚟。
ICT 重點
UEFI 嘅全名係「統一可延伸韌體介面 Unified Extensible Firmware Interface」，為每部電腦提供開機程序同為電腦嘅「韌體」（一啲攞嚟直接操作硬件嘅低層程序）。係未有 UEFI 之前，我哋係用「基本輸入輸出系統 Basic Input/Output System」（BIOS）去做開機。咁電腦開機嘅時候，會發生乜嘢事呢？電腦其實會執行以下嘅事：
- 首先，你㩒着咗部電腦，電腦就會先執行儲存係唯讀記憶體（Read-only Memory；ROM）上面嘅 BIOS。呢個 BIOS 同第 1 課入面講嘅 Stored Programme （貯存程序）其實係同一件事。另外，使用 UEFI 嘅電腦，UEFI 通常係儲存係 EEPROM 上面。
- 電腦檢查完 BIOS/UEFI 嘅設定之後，就會嘗試執行「加電自檢 Power-on Self-test」（POST）。係 POST 過程，電腦會檢查各個部件係咪被正確安裝、係咪正常運作。例如：CPU 係咪正常運作？RAM 有無鬆到？有無插 Keyboard？ 有啲電腦會係底版（Motherboard）上面安裝一個蜂鳴器。如果 POST 正常嘅話，蜂鳴器就會 Beep 一聲；有問題嘅話，就會用特定嘅 Pattern 去響，話俾你知有乜問題。（當然，依家嘅電腦就已經識得 display 個 error 出個 mon 到啦，所以先會有嗰個 Keyboard Not Found: Press F1 to continue 嘅 Meme。）
- BIOS/UEFI 會試下從輔助貯存（Secondary Storage）上面搵開機程式（Bootloader），由開機程式加載操作系統。
當年 BIOS 用得好哋哋，點解會被 UEFI 取代呢？因為 BIOS 有唔少科技上嘅限制。例如，BIOS 搵 OS 嘅時候，儲 OS 嘅 Secondary Storage 最多只可以用 2TB 嘅容量。依家嘅 Secondary Storage 唔少已經超過咗 2TB，所以硬件同軟件廠商就聯手重新制定 BIOS 嘅規格，結果就有咗我哋依加嘅 UEFI 啦！
相關課題
- 必修部分第 11 課：關於唯讀記憶體（ROM）
新聞來源／詳細閱讀
🔖 News 2: 研究員建議以機器學習作為藍牙的認證方式
研究員建議用機器學習嘅方法，去認證兩部藍牙裝置中嘅溝通。
以往，只要兩部裝置透過藍牙連接嘅話，佢哋之間嘅認證會永久有效，除非用戶手動解除。但係，隨住有更多物聯網（Internet Of Things）設備使用藍牙嚟連接，永久有效嘅跨裝置認證會帶嚟保安問題。研究員提議嘅呢項技術稱為「Verification of Interaction Authenticity（VIA）」。佢為負責處理兩部裝置間持續認證同自動解除認證。
VIA 會透過機器學習嘅方式，深度檢查裝置之間嘅數據包（Packet）。如果 VIA 發現裝置嘅溝通出現問題（例如同奇怪嘅 Server 溝通）嘅話，就會解除對裝置嘅認證。
ICT 重點
藍牙連接嘅優缺點，往往係同學仔比較少留意嘅課題。主因係因為同學仔 Wi-Fi 嘅效能比較好，亦比較普及，所以比較少去主動了解藍牙技術。但係，其實唔少物聯網嘅設備同可攜式設備（例如係無線耳機等）係設計嘅時候都選擇用藍牙作為連接媒介。選擇藍牙嘅主因有兩個：
- 藍牙嘅用電量比 Wi-Fi 低。
- 藍牙嘅技術比 Wi-Fi 更簡單，例如藍牙預設使用對等網絡（Peer-to-peer Network）。
相關課題
- 必修部分第 16 課：關於連接媒介（藍牙）
新聞來源／詳細閱讀
📱 News 3: 美國司法部靠面部識別技術結束 15 年追捕
美國司法部最近成功起訴一名呃咗 20 個人上百萬美金嘅犯人。呢單案用咗 15 年去追捕，最近成功搵到疑犯，因為疑犯係澳地利用假名開銀行戶口嘅時候，被美國司法部嘅面部識別系統識別到，繼而被捕。
疑犯係 2005 年嘅時候被 FBI 調查並沒收護照，但係佢透過報失攞到一本新嘅護照，由美國逃去波蘭。呢位逃犯就係美國同波蘭係法律上嘈緊引渡嘅時候，又再次逃走，最尾去到澳地利。
ICT 重點
呢個絕對唔係第一次執法人員用科技嚟幫助破案同拉人，而科技亦唔係萬能。例如，面部識別系統最擔心嘅，就係假陽性（False Positive）嘅問題（姐係話系統以為係個逃犯，但原來唔係）。呢啲問題可以透過改善機器學習嘅模型，係大學讀多啲 Bayesian Statistics 就可以解決。
但係有啲問題唔係咁容易解決到嘅。例如，呢類系統會令公眾擔心政府過度監控。呢個唔係單係科技可以解決。所以 Willis 成日同學仔講，科技嘅問題容易解決，所以個重點永遠都係喺點樣解決人嘅問題： 點樣做解釋、點樣做遊說。令用戶欣然接受新嘅系統，先係 System Analyst 最棘手嘅工作。
相關課題
- 選修單元 A 第 12 課：關於數據開採及其應用
新聞來源／詳細閱讀
問題回顧
- 電腦開機嘅時候，會發生乜嘢事？
- 點解唔少裝置會使用藍牙作為連接媒介？
- 面部識別系統需要解決嘅一個大問題係乜嘢？
鐘意篇文嘅話，麻煩係下面個 IG Post 上面俾個 Like ❤️ 感謝感謝
